Spartak Ngjela paralajmëron zhvillime të bujshme: Ja, kjo është situata që goditi dje ambasadorja amerikane në Tiranë

Avokati i njohur Spartak Ngjela shprehet se pushtetarët e korruptuar në Shqipëri nuk kanë asnjë shpresë. Sipas tij SHBA me sistemin e ri të drejtësisë që ka ngritur në Shqipëri po u jep goditjen përfundimtare.

Analiza e plotë:

“Nuk e kuptoj: pse janë kaq primitivë në besim ndaj kohës që po vjen, këta pushtetarë të korruptuar të Shqipërisë?

Nuk kanë asnjë shpresë, sepse kanë grabitur shtetin shqiptar dhe shqiptarët; prandaj kot vërtiten e sillen vërdallë. Vodhën, sepse vinin nga hiçi, dhe po vinë vërdallë po nga hiçi: nuk e shpëtojnë dot gjënë e vjedhur… por ata ende shpresojnë, kur Cezari na ka thënë:
Ex nihilo nihil fit (nga hiçi vjen hiç)

Por, një pyetje për ata është kjo: a do të zbatohet Kushtetuta e vitit 2016? Dhe pyetja tjetër është: mos ndoshta këta të korruptuar po presin shkatërrimin e Shteteve të Bashkuara të Amerikës? Dhe, sërish një pyetje është: e dinë këta që bota shqiptare në të katër shtetet ballkanikë ku jetojnë shqiptarët: Shqipëri, Kosovë, Maqedoninë e Veriut, dhe në Mal të Zi; përfaqëson sot një intetes të madh amerikan, njëlloj si interesi i Austro-Hungarisë në periudhën 1890 – 1915? Dhe, më në fund: Vertet mendojnë këta të korruptuar se do të fitojë Moska dhe Beogradi kundër shqiptarëve, tani që aleanca amerikano-shqiptare është e ngritur kundër interesit rus në Ballkanin Perëndimor? Ja, këto janë pyetjet që duhen ngritur përballë korrupsionit shqiptar.

l.
Ajo që mund të thuhet është se sot, edhe presidenti i Serbisë Vuçiç, edhe korrupsioni shqiptar shpresën e kanë te largimi i Amerikës edhe nga Kosova, edhe nga Shqipëria. Dhe janë pasiononte që i mbyt interesi individual mesjetar, i cili po i drejton edhe në kohët moderne.

Një mendje kanë: si korrupsioni shqiptar në Shqipëri e në Kosovë, edhe presidenti i Serbisë, një kalorës mesjetar ky, që po pret largimin e Amerikës nga Shqipëria dhe nga Kosova.
Po nuk e patë, o mjeranë të Serbisë, se si politika amerikane, në Uashington, në 4 shtator, bashkoi në një marrëveshje të thellë historinë mijëravjeçare të iliro-epirotëve me hebrenjtë, dy popujve më të vjetër të Evropës dhe të Lindjes së Mesme?!
Ende paska shpresë ky derëziu Vuçiç!

ll.
Shumë shpresë kishte Vuçiç te presidenti Trump, se e gënjente mendja dhe e mendon politikën amerikane me psikologjinë e Milosheviqit. Por edhe frikë kishte, dhe frikë edhe ka.
Tani, ky kaqol, nuk po kupton fare se çfarë po ndodh, është rob primitiv i mendimit fals të “Serbisë mijëravjeçare” në Ballkanin Perëndimor, sepse, pasi e ka parë që kjo ka qenë një gënjeshtër historike, dridhet dhe vjen vërdallë. Ai tani e di mirë që shteti i Serbisë është një investim në falsitet, i bërë nga ruso-francezët, dhe prandaj është pushtuar nga deliri se do ta shpëtojë Serbinë dhe do të ripushtojë Kosovën me të shiturit në Prishtinë dhe në Tiranë. Prandaj tha dje: “po të ikë Amerika nga Kosova, shqiptarët e Kosovës bashkohen me Serbinë”.

Por, njëlloj si Vuçiç që sheh endërra në diell e me sy hapur; edhe këta të korruptuarit shqiprarë në Tiranë e në Prishtinë, edhe pse kuptohet se kanë mend më shumë se tarallaku Vuçiç, janë në gjendje të rëndë se kanë vjedhur.

Vuçiç është mbi kalin mesjetar të përrallës se Serbisë së Madhe, të lindur edhe me përkrahjen e Perandorisë Osmane. Kurse, këta tanët, kanë hipur mbi kalin e Esat Toptanit. Se edhe Ahmet Zogu në kalin e Esat Toptanit ishte kur u kthye me hordhitë sllave në pushtet, pavarësisht se më pas i kthehu bërrylin Jugosllavisë.

Edhe Enver Hoxha, në kalin e Esat Toptanit kishte hipur kur i la Kosovën Jugosllavisë në vitin 1944-1945, pavarësisht se, si Ahmet Zogu, edhe ky i kthehu bërrylin Jugosllavisë në vitin 1948.
E pra, këta janë, pikërisht këta, që, në Tiranë po mundohen të bllokojnë Byronë Këmbëtare të Hetimit, kurse në Prishtinë deshën t’i jepnin Serbisë gjithë Veriun e Kosovës.

lll.
Ja, kjo është situata që goditi dje ambasadorja amerikane në Tiranë, kur tha se “politika e lartë në Tiranë po kërkon të bllokojë Byronë Kombëtare të Hetimit”. Domethënë reformën antikorripsion.

Megjithatë, ambasadorja Yuri Kim tha shumë pak, pavarësisht nga gjuha e drejtpërdrejtë që përdori. Ajo duhet të thotë edhe më tepër në mendimin që iu shfaq shqiptarëve për reformën antikorrupsion. Mendoj se ka ardhur koha që ajo, me ekspertët amerikanë, duhet të organizojë, me analizë direkte dhe konkrete, një simpozium shkencor për reformën antikorrupsion në Shqipëri.

Ambasadorja Yuri Kim duhet ta dijë që shqiptarët e mençur dhe patriotë e kanë shpresën tek ajo; domethënë te politika amerikane në funksion të shkatërrimit të korrupsionit të lartë shtetëror. Shqipëria dhe e gjithë bota shqiptare në Ballkanin Perëndimor po pret vendosjen e moralitetit dhe drejtësisë në politikën shqiptare dhe në qeverisjen e saj.