“Po nuk iku Basha nuk kthehem në PD”, Mark Marku flet për deklaratën e bujshme të Jozefina Topallit

Anëtari i Komisionit të Vlerësimit të kandidatëve të PD për zgjedhjet e 25 prillit, Mark Marku ka komentuar kritikat e ish-kryeparlamentares Jozefina Topalli ndaj kryedemokratit Lulzim Basha.

Marku tha për Report Tv, se e vlerëson Topallin për kontributin në PD, por sipas tij me përvojën që ajo ka nuk duhet t’i bënte ato deklarata.

“Personalisht se qëllimin kritik të kujtdo e vlerësoj, në këtë kuadër s’kam si mos vlerësoj kritikat që vijnë kundër kujtdo. Qoftë edhe ndaj Bashës.

Për rastin e zonjës Topalli, por edhe të pjesës tjetër të kritikave. unë mendoj që është një marrëdhënie politike mes Bashës dhe Topallit dhe nuk kam dashur të hyj në marrëdhënien e tyre.

E para unë mendoj që, normalisht që e vlerësoj zonjën Topalli për të gjithë atë çfarë ka përfaqësuar deri tani në Partinë Demokratike, por edhe përtej në kuptimin një grua dinjitoze që ka ndjekur karrierën e vetë, nga Shkodra, me një familje të persekutua.. E kam vlerësuar përherë zonjën Topalli dhe mendoj që për vlerat që përfaqësonte i takonte ai rol në Partinë Demokratike. Po çfarë do t’u thoja unë kritikave të kritikëve të Bashës. Nëse ata ia lejojnë vetes të jenë kritik ndaj Bashës, duhet të na lejojnë edhe ne të jemi. Ajo që kërkon zonja Topalli, që po nuk iku kryetari Basha, mendoj që është jopolitike në vetvete. Me përvojën që ka nuk do të duhej t’a bënte. Pra, një parti nuk mund të vihet para alternativës, ose ky ose unë.

Ideja është se ajo çfarë kërkon zonja Topalli për ikjen e kryetarit të PD-së, është jo politike”, tha Marku.

Sipas tij, kryetari i PD-së kishte marrë një parti të shkatërruar dhe duke pasur parasysh se disa persona nuk e pranonin lidershipin e tij, Basha nuk ka pasur mundësi që ta tregojë veten.

“Basha nuk ka pasur mundësi të tregojë veten, se ka marrë një parti të shkatërruar, me njerëz që nuk e pranonin lidershipin e Bashës. Unë i kuptoj si Astrit Patozin, si të ndjerin Sokol Olldashi që normalisht brenda partisë do kishte pakënaqësi. Pra Basha nuk ka pasur mundësi që të tregojë veten”, tha Marku.