Plas keq mes PD dhe LSI, Basha godet rëndë Metën

Thellohen divergjencat dhe përplasjet mes Partisë Demokratike dhe Lëvizjes Socialiste për Integrim. Presidenti Ilir Meta dhe partia e tij i kanë ushtruar presione të vazhdueshme kryedemokratit Lulzim Basha me qëllim që PD të fusë në një listë të përbashkët edhe LSI në zgjedhjet parlamentare të 25 prillit të vitit 2021. Por dje zoti Basha ka dhënë një sinjal të fortë se Partia Demokratike mund të shkojë drejt divorcit final me Lëvizjen Socialiste për Integrim. Teksa zhvilloi një takim me studentët e Universitetit Bujqësor, ku shpalosi detaje nga programi i PD, lideri demokrat shpërtheu në akuza në adresë të presidentit Meta, të cilin e bëri bashkëfajtor për keqqeverisjen.

Sipas tij, në 8 vite që Edi Rama është në pushtet nuk ka mbajtur asnjë pretim dhe ka rrënuar bizneset e qytetarët shqiptarë. “Ka një pengesë të madhe për zhvillimin dhe pengesa është pikërisht një qeveri që për 8 vite me radhë ka premtuar dhe s’ka mbajtur asnjë premtim. Ka dështuar të çojë përpara qoftë edhe një fushë të vetme të ekonomisë apo të zhvillimit”, deklaroi ai. Por fakti që kryedemokrati Basha ka përmendur 8 vite qeverisje të Ramës që ka sjellë vetëm regres në Shqipëri, është një mesazh i qartë që shkon edhe për presidentin Ilir Meta, pasi Partia Socialiste në mandatin e parë nga viti 2013 deri në vitin 2017 ka qeverisur me Lëvizjen Socialiste për Integrim. Pra, duket qartë që Basha godet Metën dhe e bën bashkëfajtor për keqqeverisjen.

Basha shton sinjalet për divorcin me LSI.

Por sulmet dhe akuzat në adresë të presidentit Ilir Meta nuk ishin të vetmet, pasi ditën e djeshme gjatë bashkëbisedimit me studentët e Universitetit Bujqësor, kryetari i Partisë Demokratike, Lulzim Basha ka dhënë sinjale për divorc nga Lëvizja Socialiste për Integrim. Kjo e fundit kërkon lista të përbashkëta në zgjedhje, por Basha dje ka dhënë sinjale të forta se do shkojnë të ndara. Ai e cilësoi gabim vitin 2013 kur PS-LSI erdhën në pushtet. “Përsëritja e të njëjtit gabim me të njëjtin rezultat është marrëzi.

Gabimi nisi në vitin 2013-të. Erdhi me premtime të mëdha me 300 mijë vende pune, me reformën e sistemit të arsimit. Vazhdoi në 2017-ën me tepsi e me timon. Tani nuk ka më kohë. Mjaft është mjaft. Tani është koha për ndryshim. Mosndryshimi do të kishte pasoja fatale. Ky është momenti i fundit për të ndryshuar kurs dhe e vetmja që mund ta bëjë këtë është bashkimi i vlerave. E vetmja që mund ta ndalë këtë të keqe është bashkimi i vlerave. Është opozita, Partia Demokratike, me vizionin për zhvillim në bashkëpunim, me rininë shqiptare dhe me gjithë qytetarët shqiptarë që duan t’i japin formë dhe thelb ndryshimit”, u shpreh ai.

Basha flet mbi listat.

Në mbrëmje kreu demokrat i vuri kapak gjithçkaje. I ftuar në “Çim Peka LIVE”, Basha u pyet disa herë nga moderatori nëse do pranojë listë të përbashkët me LSI, por ai e shmangu duke dhënë sinjale se do shkojnë të ndara më 25 prill. “Opozita do të jetë e bashkuar në zgjedhje! Opozita është e bashkuar dhe do të paraqitet e bashkuar për t’i dhënë formë dhe përmbajtje aspiratës së shqiptarëve për ndryshim. Për të ndëshkuar dështimin me emrin Edi Rama. Edhe me sistemin siç ishte para se Edi Rama të fuste duart prapë secili do garonte me listën e vet. Edhe me ndryshimet që ka bërë opozita do të bëjë maksimalizimin e votës së saj me format dhe mënyra që po i çojmë drejtë konkludimit me të gjithë partnerët tanë. Me LSI dhe aleatët e tjerë. Listat janë teknikalitete dhe ne nuk do të lejojmë që shumica e shqiptarëve që e duan ndryshimin të privohen nga e drejta për të votuar”, nënvizoi Basha.